Uznews.net – Самарқандлик қассоблар, тошкентлик ҳамкасбларидан фарқли, гўштнинг килосини 7000 сўмдан сотишни исташмади, мана бир неча кундирки улар ишга чиқишмаяпти.

Самарқанддаги гўшт расталари ёпиқ. У ерга келган ҳаридорлар, асабий тарзда бош чайчаб нари кетишади. Шу каби манзара шаҳарда бир неча кундан буён кузатилмоқда.

Самарқандлик қассоблар гўштни юқоридан “туширилган” нархда сотишдан бош торитишмоқда. Шаҳар маъмурияти бир килограмм гўшт нархини етти минг сўмдан, тахминан 25% паст нарҳга белгилади, ўтган ҳафтада унинг нархи 9000 эди.

Ҳукуматнинг, мажбурий чоралар билан зарур махсулотлар нархини пасайтириш ва шунинг эвазига фуқаролар фаровонлигини оширишга ҳаракати на сотувчилар ва на ҳаридорлар томонидан қувватланмаяпти.

“Uznews.net”нинг Самарқанддаги барча сухбатдошлари ҳукуматнинг навбатдаги “кўзбўямачилиги”ни қоралаб гапиришди.

Нархлар фуқароларнинг даромадларига мувофиқ эмас ва аксарият ўзбекистонликларнинг гўшт сотиб олишга қурблари етмайди.

Айни пайтда, чорва бозорида, молнинг қимматлаётганини кузатиш мумкин. Бу ўз навбатида ем хашакнинг қимматлаётгани, шунингдек, чорва моллари сонининг пасайиб кетаётгани билан боғлиқ.

Uznews.net