Uznews.net – Бугунги Андижон учун характерли манзараларнинг бири заправкалардаги бензин учун навбатнинг километрлаб чўзилганидир.

Гарчи, 1 июлдан бошлаб Ўзбекистонда бензин нархлари ўртача 15 фоизга ошганига қарамай, у танқислигича қолмоқда. Автомобилига ёнилғи қуйиш учун ҳайдовчилар тонг саҳардан навбатга туришади. Бироқ уловларига бензин олиш ҳамиша ҳам уларга насиб этавермайди.

АЁҚШлардаги бензин танқислиги ҳайдовчиларни олибсотарларга мурожаат этишга мажбур қилмоқда, уларнинг кўплари, халқ орасида заҳархандалик “Қувайт” номини олган ҳудудда иш олиб боришади.

Бироқ шоҳобчаларда Ai-80 маркали бензиннинг литри 1220 сўм бўлса, бу ерда уларнинг устига минимум икки минг қўшимча қилиш керак.

Андижонликларнинг айримлари бу ҳолат сабабини Тошкентдаги юқори мансабдорларнинг алмаштирилаётгани билан изоҳлашади.

13 июл куни ҳукумат вице бош вазири Эргаш Шоисматов ва “Ўзбекнефтегаз” Миллий холдинг ширкати раиси Улуғбек Назаров ишидан олинган эди.

Одамлар уларнинг олинишини гўёки, Каримовнинг Тошкент автозаправкаларида узундан узоқ навбатларни кўргани билан боғлашади. Бироқ уларнинг кетиши билан яхши томонга, жуда бўлмаганда вилоятларда бирор ўзгариш бўлгани йўқ.

Бугун вилоятларнинг бирортасида дизел ёнилғиси қуйиш имкони йўқ. Айрим нефт конларида унинг йўқлиги туфайли қазиб олиш ишлари тўхтатилган.

Хадемай пахта териш мавсуми бошланади, ахир деярли барча қишлоқ хўжалик техникаси шу ёнилғи билан ишлайди.

Яқиндагина йирик корхоналар рахбарлари автомобил паркларидаги автомобилларни сиқиқ газ ёнилғисига мослаштириш ҳақида циркуляр хат олишди.
Бу етилган муаммони ҳал қила оладими – буни вақт кўрсатади.

Uznews.net