Uznews.net – ЕҲҲТ Доимий Кенгаши шу ҳафтада ташкилотнинг полиция контингентини Қирғизистон жанубига киритиш ҳақида расмий қарор қабул қилади, сўнгра миссияни бошлаш учун фаол тайёргарликлар кўрилади.

Европада ҳавфсизлик ва ҳамкорлик ташкилоти, ўткан жумада Қирғизистон билан ЕҲҲТнинг полиция маслаҳат гуруҳини қирғиз жанубига жойлаштириш хақидаги музокараларини якунлади, эндиликда сўнгги расмиятчиликка ҳозирлик кўрилмоқда.

У ҳам бўлса, шу ҳафта сўнггига режаланган ЕҲҲТ Доимий Кенгаши йиғилишидир. Унда ташкилотнинг Қирғизистон жанубида 52 кишидан иборат полициячилар гуруҳининг жойлаштирилиши ҳақида якуний қарорга келинади.

Ушбу йиғилишдан кейин, Вена(Австрия)даги ташкилот матбуот хизмати вакили Фрэйн Мароевич (Frane Maroevic)нинг айтишича, ЕҲҲТ полициячилар гуруҳини Қирғизистонга жўнатишга ҳозирлик кўра бошлайди, шунингдек уларнинг этник нафратга асосланган қотилликлар ва босқинлар содир этилган Ўш ва Жалолободга борадиган аниқ кун ҳақида гапириш мумкин бўлади.

Кирғизистоннинг келишувига асосан, минтақанинг

	Одамлар ҳамон бошпанасиз, уларнинг уйлари вайроналарга айланган

жанубий ҳудудига 52 нафар полициячилар жўнатилади, бироқ кейинчалик улар сафига тағин 50 нафар полициячи қўшилиши мумкин. Полициячилар гуруҳи, дастлаб белгиланганидек Қирғизистонда тўрт ой мобайнида бўлишади, бироқ бу муҳлат томонларнинг келишувига биноан узайтирилиши мумкин.

ЕҲҲТ полициячилари гуруҳига ташкилотга аъзо 56 давлатнинг ҳар қандай вакиллари кириши мумкин. Улар Қирғизистон жанубига ўз миллий формаларида жўнатилади ва уларнинг билакларида ЕҲҲТнинг маслаҳат полициячилари гуруҳига алоқадорликлари ҳақидаги нишон бўлади.

ЕҲҲТ полициячиларининг вазифаси, Мароевичнинг сўзларига кўра, қирғиз милициясига маслаҳат ёрдами кўрсатишдан иборат бўлади. Улар аҳоли орасидаги фаолият давомида қирғиз миршабларига ҳамроҳ бўлишади, Қирғизистон жанубининг жаъми аҳолиси билан алоқалар ўрнатишади.
 
ЕҲҲТ полициячилари гуруҳининг Қирғизистон жанубига жўнатилиши ҳақидаги қарор халқаро ҳамжамиятнинг, 10 дан 11 июнга ўтар кечаси Ўш ва Жалолободда авж олган кескин этнинг низоларга нисбатан жиддий жавоби бўлди.

Қирғизистон жанубида, зич яшаётган маҳаллий ўзбек аҳолиси, бир соат ичида жисмоний йўқ қилиб ташланиш ҳавфи остида қолди.

Қирғиз миллатчи гуруҳлари ҳарбийлар ва уларнинг техникалари ҳимояси остида ўзбекларнинг уйларини яксон қилишди ва уларнинг ўзларини на аёллар, на болалар, на қариялар бўлишига қарамай аёвсиз ҳалок қилишди.

Қирғизистон президенти Роза Отунбаева, зиддиятлар бошлаганидан ҳафта ўтиб Ўшга келганида, қурбонлар сони икки минггача етиши мумкинлигини айтди.

Uznews.net